Isumat.com/2:57PM, May 18, 2020
Iginbi-biyahe na yana tipakanhi ha Region 8 an mga relief goods para han mga katawhan nga apektado han makusog nga bagyo Ambo nga nagdurot hin grabe nga danyos ha pira nga bungto ha Eastern ngan Northern Samar.
Sumala han gibabag-uhi nga impormasyon tikang ha DSWD-Regional Office, ano man nga adlaw yana nga semana maabot na an yinukot-yukot nga relief packs tikang ha Visayas Disaster Resource Center(VDRC) ha Cebu. Ini an iginkarga na ha mga eroplano han Philippine Air Force sugad man ha mga barko han Philippine Navy ug an iba hini iginbi-byahe na.
An DSWD-Region 8 in nag-request hin 40,000 nga kadugangan nga family food packs para han mga nadarahigan han bagyo. Dida han Sabado, mayda na sobra usa ka yukot nga food packs an dumangat ha Northern Samar.
Subay han panguna nga report nga nahikay han ahensya, haros 63 Mil ka pamilya an apektado ni Ambo, kun diin sobra 33 Mil an tikang ha Eastern Samar ngan sobra sobra 29 Mil an tikang ha Northern Samar.
Tobtob han ginsusurat ini nga notisya, an DSWD upod han mga kasagabay nga mga grupo in nakag distribuer na hin 5,900 food packs ha Eastern Samar ngan 8,850 food packs ha Northern Samar.
Ginababanabana han DSWD nga magtitikadamo pa an ihap han mga apektado nga pamilya han bagyo kay tobtob yana nagpapadayon pa an mga Local Government Units han ira panginano ha ira mga lugar basi makumpleto an listahan han mga tatagan hin hinabang.
Hi Ambo an nagdagmal hin pira nga bungto didto han duha nga probinsya ug nagbaya ini hin porlomenos upat ka tawo nga namatay ngan yinukotyukot nga nagkaruruba nga kabablayan, labot la han minilyon-milyon ka peses nga distroso ha agricultura. # (KEVIN SIOSANA)
