Isumat.com/8:56AM, May 16, 2020
Minilyon-milyon nga kantidad hin distroso ha infrastraktura ngan agrikultura an nadistroso ni bagyo Ambo ha Eastern ngan Northern Samar, labot la ini han sobra dos mil nga kabablayan nga nagkaruruba dara han pagmalmal han bagyo.
Subay han panguna nga report han PNP-Regional Office, 2,097 nga kabablayan an nadarahigan han makusog nga bagyo nga nagdagmal han lugar hadin Huebes nga adlaw kun diin syahan nga nag landfall ini ha San Policarpo, Eastern Samar.
1,692 nga kabablayan an nagkaruruba ha Eastern Samar. Ha San Policarpo, igin report nga 70 porsyento han kabablayan an nadistroso. Kadam-an hini nga kabablayan in hinimo-an hin light materials sugad hin kahoy ngan pawod, pero damo liwat nga yero an atop an iginlupad han bagyo.
200 nga balay an totally-damaged ha Lope de Vega ngan 150 ha Laoang, Northern Samar. Lima naman nga balay an ginhapwat han makusog nga hangin ha Samar.
An mga umhanan ngan fishponds ha Bobon, Laoang, Lope De Vega ngan Mondragon ha Northern Samar in grabe gihapon an epekto han bagyo.
Ha bungto han Jipapad, Eastern Samar, naka-eksperiensya an mga mulopyo han gihahata-asi nga baha ha kasaysayan han bungto sugad man an duro kamakusog nga hangin.
Sumala kan Jipapad Mayor Benjie Ver, nalunupan han baha an haros 500 ka sako hin bugas nga kaparte han relief goods. Nananawagan gihapon hiya hin ayuda sugad hin pagkaon, tubig ngan medesina. Tobtob yana nga aga, an Jipapad in isolated area kay an tulay ngada han bungto an na-wash out han baha.
Nagpapabilin nga waray kuryente an mga bungto han San Policarpo, Arteche, Oras, Jipapad ngan Maslog ha Eastern Samar. # (KEVIN SIOSANA)
