Isumat.com/7:57AM, May 15, 2020
Hinay-hinay yana nga magkakabalik ha ira tagsatagsa nga puy-anan an sobra syete mil nga mga mulopyo ha Northern ngan Eastern Samar nga temporaryo nag-ukoy ha mga evacuation centers samtang ginlalatob ni Bagyo Ambo an ira lugar kakulop nga adlaw..
Dida han inisyal nga report han Office of Civil Defense, 7122 an mga evacuees ha Northern Samar ngan 135 ha Eastern Samar. Hira yana in mangunguli na ha ira mga balay kay pumahirayo na an bagyo. Pero an iba nga pamilya in magpapabilin ha evacuation centers samtang gin-aayad o gintitindog pa an nagkaruruba nga kabablayan.
Kadam-an han mga evacuees in nangaturog dida han mga COVID Isolation Areas nga ginhimo la anay nga evacuation centers.
Iginpatapod han mga opisyales han apektado nga mga probinsya nga matatagan hin ayuda an mga evacuees bisan pa man duha na ka bulan an panhatag han relief goods dara han COVID-19 crisis.
Waray naman makatabok tikang ha pantalan han Allen, Northern Samar ngadto ha Matnog, Sorsogon in 332 ka tawo nga sakay hin 110 nga behikulo.
Ginbabanabana nga yana nga adlaw bubulkason na an mga Typhoon Wind Signal ha Northern Samar kay nagtikaharayo na an bagyo.
Hapagkayana, nagpapadaayon an mga otoridad han pag-asses han distroso ni Ambo sugad man clearing operations ha mga kakalsadahan. An suplay han kuryente in hinayhinay liwat nga nababalik na ha apektado nga mga lugar.
Syahan nga nag landfall hi Ambo ha San Policarpo, Eastern Samar ngan gintarap hini an mga lugar ha butnga ha Samar Island ngan nag landfall na liwat kagab-i ha may Capul, Northern Samar san-o ini tumabok tikadto ha Masbate ngan Burias Island. # (KEVIN SIOSANA)
