Isumat.com/8:20AM, May 12, 2020
Negatibo ha corona virus an syahan nga batch han swab samples nga ginpa-ilarum ha confirmatory test han Eastern Visayas Regional COVID-19 Testing Center (EVRTC).
An walo nga samples amo in ngatanan negatibo han makamaratay nga kagaw, pahayag han DOH. Ini nga samples amo an gisasyahani nga batch nga ginproseso han Molecular Laboratory nga nagtikang han operasyon kakulop nga adlaw (Mayo 11).
Lakip dida hini nga nag negatibo an ikaduha nga sample han Positive Case nga Taga-Catbalogan City. Kukuhaan pa hiya utro hin sample ngan kun mag negatibo na liwat, puede na hiya ma discharge ha hospital.
Dara hini nga operasyon han EVRTC, deri na igpapadara ha Vicente Sotto Memorial Medical Center ha Cebu an mga samples para han laboratory test ngan kada adlaw magpapagawas hin resulta an EVRTC han ira naproseso nga samples.
Hapagkayana, an DOH-Region 8 in naghuhulat pa han resulta para hin 109 nga samples tikang ha Cebu. Iginpadara ini ngadto antis pa an pag-abri han EVRTC.
An Eastern Visayas in mayda na 20 ka tawo nga natapnan han virus ngan hapagkayana mayda ginmomonitor nga 1031 nga Suspected Cases. 62 hini in naka-confine ha magkalainlain nga hospital ngan 969 in aada ha Home Isolation. # (KEVIN SIOSANA)
