Isumat.com/2:32PM, May 9, 2020
Haros katunga pala han ngatanan nga Local Governments Units ha Region 8 an nakakumpleto han panhatag han Social Amelioration Program (SAP) cash assistance nga nagkakantidad hin singko mil pesos para han kwalipikado nga mga pamilya. Ini in subay han report han DSWD tobtob han Biernes (Mayo 8).
Nagpahayag an DSWD nga tobtob kakulop, dida han sobra 140 nga LGUs, 73 pala an natapos han pay-out hini nga ayuda pinansyal han gobyerno para han kablas nga mga pamilya yana nga panahon han krisis durot han COVID-19 pandemic.
Dida hini nga 73 LGUs, naabot hin 2.3 Bilyones pesos an ginmamlunan hin 449 ka yukot nga pamilya. Gintatarget han DSWD nga matapos na an ngatanan nga LGUs panhatag hini buwas (Mayo 10). Duha na ka beses nga nagkaada hin extension an deadline han panhatag tungod hin magkalainlain nga rason nga nakadelatar han pay-out.
An mga munisipalidad nga nakakumpleto han distribusyon amo an masunod: Para han Leyte – Alangalang, San Miguel, Barugo, Burauen, Julita, Macarthur, Tabontabon, Tunga, Leyte, Tabango, Matag-ob, Bato, Hindang, Inopacan, Javier, Mahaplag ngan Matalom.
Southern Leyte – Anahawan, Hinunangan, Hinundayan, Libagon Liloan, Limasawa, Macrohon, Padre Burgos, San Juan, San Ricardo, Silago ngan Tomas Uppos.
Northern Samar – Biri, Bobon, Capul, Lope de Vega, Lapinig ngan San Roque.
Eastern Samar – Artache, Balangiga, Balangkayan, Can-avid, Gen Macarthur, Giporlos, Hernani, Jipapad, Lawaan, Maslog, Maydolong, Mercedes, Oras, Quinapondan, San Policarpo ngan Taft.
Samar – Almagro, Gandara, Matuguinao, Pagsanghan, San Jorge, Sta Margarita, Sto Nino, Tagapul-an, Basey, Calbiga, Daram, Hinabangan, Jiabong, Marabut, Motiong, Paranas, Pinabacdao, San Jose de Buan, San Sebastian, Sta Rita, Villareal ngan Zumarraga.
An iba nga mga bungto ngan syudad in nanlilimbasog nga matatapos buwas an panhatag. An DSWD in nakagbukalas hin kantidad nga 2.980 Bilyones pesos para han ngatanan nga beneficiario ha Sinirangan Bisayas. # (KEVIN SIOSANA)
