Isumat.com/8:29AM, May 8, 2020
Nagpakamatay in usa nga lalaki kakulop (Mayo 7) ha bungto han Kawayan, Biliran ug gintotoohan nga an rason amo an pag positibo niya ha Rapid Anti-Body Testing.
Ginkilala an biktima ngahi Diosdado Tancinco, 63 anyos ngan nag-uukoy ha Brgy Tucdao han nasabi nga bungto. An mga imbestigador in nakakuha hin caliber 357 revolver dida han lugar han panhitabo.
Dida han imbestigasyon, ginkikitakita nga depression an usa nga anggulo han iya pagpakamatay. An Rapid Test in gindumara ha iya ha Ormoc City hadton Mayo 1. Pumakadto hiya hin usa nga hospital basi magpa-dialysis tungod han iya sakit ha kidney.
Antis an dialysis, ginhimo an Rapid Testing para han corona virus ngan positibo an resulta. An doktor in nagsagdon ha iya para hin hemodialysis han iya sakit. Tungod nga deri bastante an iya kwarta, nagdesider an pasyente nga mauli la anay hiya ha Kawayan ngan mapa confine ha Biliran Provincial Hospital.
Dida han Mayo 2, ginkuhaan hiya hin swab sample basi igpadara ha Cebu para han confirmatory test. Waray na hiya humulat han resulta han testing kay kakulop, nakakarawat hin impormasyon an kapulisan nga nagpakamatay hi Tancinco pinaagi han pagpusil han iya kalugaringon. An kapulisan in nagpapadayon pa han imbestigasyon hini nga insidente.
Samtang ha iba naman nga panhitabo ha Biliran Province, duha naman nga residente ha bungto han Naval an nag positibo ha Rapid Test. Usa hini amo an 13 anyos nga lalaki ha Brgy Larrazabal, ug an usa amo in 32-anyos nga babaye ha Brgy Agpangi.
Ginkuhaan na hira hin swab samples ngan naghuhulat pa han resulta han confirmatory test tobtob yana.
An DOH in nagpahayag nga an Rapid Testing in deri conclusive nga resulta, sanglit deri ini puede gamiton pagkumpirmar kun positibo ha corona virus an usa nga tawo. # (KEVIN SIOSANA)
