Isumat.com/8:37AM,April 28, 2020
Makusog an panawagan hin kadam-an nga mga bungtuhanon han Tarangnan, Samar nga deri na pabalikon ha ira lugar an doktor nga taga Calbayog City nga amo an gintotoohan nga nakatapon han corona virus didto han ira munisipalidad.
Hi Tarangnan Mayor Arnel Tan in nagsumat nga nagpetisyon na an mga mulopyo ha panuyo nga deri na kumadto pa utro ha ira bungto an 63-anyos nga doktor.
Sering pa man han mga residente, waray maghirot ini nga lalaki kay bisan may travel history hiya ha Manila, pumakadto la gihapon hiya ha Tarangnan Community Hospital kun diin hiya nagtatrabaho. Hinungdan hini, nakatapon hiya didto han mga ka-urusa ha hospital ngan yana nagkatatapnan na gihapon in pira nga mulopyo.
An nasabi nga petisyon an igpapadangat han LGU ngadto ha Gobyerno Provincial han Samar.
Ini nga taga Calbayog an ika duha nga nag positibo han virus ha Region 8. Pira na ka semana nga nakagawas na hiya ha hospital kay natambal na hiya ngan natapos na gihapon an iya duha ka semana nga kwarentina tikang hiya ma-discharge ha hospital.
Kakulop, iginpasamwak han DOH-Region 8 an bag-o nga unom nga COVID-19 Positive Cases ug tikang hira ngatanan ha Tarangnan. Ha kabug-usan han record han DOH, siyam na ka tawo tikang han bungto an natapnan han virus.
Iginpa-ilarum na ni Mayor Tan ha total lockdown an munisipalidad tinikangan kagab-i dungan han iya panawagan ha mga katawhan nga deri na mag ginawas-gawas ha ira kabablayan.
An DOH ug an LGU in magpapadayon han ira contact tracing ug ini nga mga tawo in kukuhaan hin swab samples basi igpa-ilarum ha confirmatory test.
Hi Mayor Tan sugad man an Provincial Government han Samar in nananawagan ha publiko nga intindihon an kabutangan yana han bungto. Ira gihapon iginsaad nga bastante an hinabang nga makakadangat han apektado nga mga residente. #
