Isumat.com/8:25AM April 21, 2020
Kadagmitan nga naghimo hin pitad an lokal nga panggobyernuhan han Tarangnan, Samar katapos la ig-anunsyo han DOH-Region 8 nga an gibabag-uhi nga COVID Positive Case ha Eastern Visayas in residente han ira bungto.
Hi Mayor Arnel Tan in nagpagawas kakulop han Executive Order No. 7 nga nagpapa-ilarum han Barangay B Poblacion ha Total Lockdown. Ini nga barangay amo an kinamumutangan han puy-anan han 60-anyos nga babaye nga amo an ika-unom nga nagpositibo han corona virus ha Region 8.
Kakulop han pasado alas kuatro han kulop, iginpasamwak han DOH ini nga notisya. Ini nga babaye in kaupod ha trabaho ha Tarangnan Community Hospital han ikatulo ngan ika-upat nga COVID patients.
Ha ilarum han total lockdown, an ngatanan nga residente han Barangay B in deri makakagawas ha ira mga panimalay. Waray gihapon bisan hin-o nga tawo nga makakasulod o makakagawas hini nga barangay, labot la han Security personnel, medical team ngan rescue unit.
An mga panginahanglan han mga residente sugad han pagkaon, tubig, medesina ngan iba pa an ig-dedeliver ha tagsatagsa nga balay pinaagi han natu-inan nga personales han munsipyo. Ini nga kamanduan in epektibo tikang kakulop ug mahagos tobtob nga may bag-o na nga kasugu-anan an alkalde.
Samtang, ginbulkas naman an Total Lockdown nga iginpatuman ha mga barangay han Imelda ngan Bahay. Ini in dara kay an patient No. 3 ngan patient No. 4 nga nag-uukoy hini nga mga lugar in nag negatibo na han kagaw. An iba naman nga barangay han munsipalidad in aada la gihapon ha Restrictive Community Quarantine.
An mga Tarangnanon in deri gihapon puede gumawas han ira bungto samtang aada pa an peligro han pagsarang han sakit. Mahugot gihapon nga igindederi an pag-inom hin makahurubog nga irimnon, ngatanan nga klase hin huego ngan mga katitirok.
Kasumpay hini, utro naghangyo hi Mayor Tan ha katawhan nga intindihon an ira kahimtang ngan ira iginpatapod nga ginbubuhat nira an ngatanan nga paagi basi kalikyan an pagsarang han makamaratay nga kagaw.
An DOH in nagdeklarar nga an corona virus in nagkaada hin local transmission dida hini nga bungto. #
