Nahibalik na ha Samar an patay nga lawas ni Ist Lt. Rogelio Deligero Jr han Phillippine Army nga kaupod dida han mga sundalo nga binawi-an han kinabuhi han madugo nga enkwentro kontra han mga terorista nga Abu Sayyaf hadton Abril 17 ha Patikul, Sulu.
Dida han Abril 19, an Philippine Air Force nga eroplano in tumugpa ha Buri Airport, Catbalogan City luran an patay nga lawas ni Deligero. Gintapo ini han mga kaapi han iya pamilya ug an mga tinaglawas han 8th Infantry Division ha panguna ni Major General Pio Dinoso. An tenyente in gintagan hin military honors dida han pag-abot han iya patay nga lawas.
Sumala han impormasyon, hi Deligero in taga Gandara, Samar. Hiya in kaapi han Probationary Officer Training Course (POCT) Class 40-2014, ug an ira batch an tinatawag nga “Sandigma.”
Hiya an Executive Officer han Delta Company han kanan Philippine Army 21st Infantry Batallion ha ilarum han 11th Infantry Division nga nakabase ha Jolo, Sulu.
Labot la kan Deligero, namatay gihapon in napulo nga mga sundalo. Samaran gihapon in katorse pa nga tropa han gobyerno. Gintotoohan naman nga mayda mga samaran ngan namatay gihapon ha panig han mga terorista dara han damo nga dugo dida han pwesto han Abu Sayyaf. An grupo nga iginkahibalag han mga sundalo in kaapi han mga batos ni Radullan Sahiron, an lider han ASG.
Sumala kan AFP Spokesperson Ramon Zagala, nakabentaha an 40 nga mga terorista kay nakadto ha igbaw an ira pwesto ug pamilyar ha ira an lugar. Humagos hin usa ka oras an balyu-ay hin bala han magkaluyo nga grupo.
Ginseguro naman han pwersa armada nga magpapadayon an ira operasyon kontra han bandido nga grupo ha panuyo nga magkaada na hin hul-os nga kamurayaw ha Mindanao. Mahugot gihapon nga ginkondenar han AFP an mga terorista han deri makatawo nga aksyon kay ginpaninigbas pa nira ngan gin-iikapurugot an ulo han namatay nga mga sundalo. #
(Posted 2:45 PM, April 20, 2020)
