Mayda suficiente nga pondo an syudad han Tacloban para han paghatag hin hinabang ngadto han mga residente nga nagkikinahanglan hini yana nga panahon han krisis han COVID-19.
Ini an iginpatapod ni Mayor Alfred Romualdez dida hin usa nga panmaki-ana han taga media. Ginklaro ni Romualdez nga deri liwat puede nga tag-usa ka sako hin bugas an ighahatag ha kada pamilya kay posible nga deri lugod mabaton an tinood nga panuyu-anan han panhatag hin relief.
Nagkagawas man gud ha social media in mga litrato nga may mga Local Government Units nga nanhahatag hin tag usa ka sako hin bugas ha kada pamilya.
Pero igindig-on ni Romualdez nga deri niya ini bubuhaton denhi ha Tacloban kay mayda nahitabo hadto nga deri nasusubay han patakaran katapos han super typhoon Yolanda. Iginsumat han amay han syudad nga durante han panhatag han relief dara han Yolanda, nagkamay-ada hin tag-usa ka sako nga panhatag han bugas, pero damo nga mga pamilya in sobra ha ira an usa ka sako, sanglit nagin negosyo na ini kay iginbaligya na.
Dara hini, an DSWD in nag warning hadto nga mayda papatukan hin sirot kay aada ha balaud nga deri puede magbaligya an bisan hin-o hin relief goods. Sumala han alcalde, deri niya karuyag nga ma-utro ini kay supak ini han balaud.
Iya iginpatapod nga andam an gobyerno pagbaton han mga panginahanglan ngan magpapadayon an ira panhatag han ayuda. Iya gihapon igindugang nga ha maabot nga mga adlaw, mahilalakip na ha relief goods an mga utanon ngan fishery products kay mapalit an syudad han mga produkto han mga mag-uuma ngan mangirisda ha aton dapit.
Sering pa han alcalde, makakabulig ini ha local farmers ngan mas masustansya an mga utanon ngan isda kontra han de-lata nga mga pagkaon. #
(Posted 7:06 PM, April 6, 2020)
