Waray la gihapon hunong an pamaligya han iligal nga droga bisan pa man naatubang an bug-os nga kalibutan han krisis dara han COVID-19. Tulo ka tawo an nasikmit han mga otoridad dara han ira iligal nga binuhatan kasumpay han shabu.
Dida han Abril 1, 2020, nadakop han kapulisan hi Daryll Guillermo, 30 anyos, call center agent ngan residente han Zone 18, Baybay City, Leyte. Ini nga suspetsado in lakip han watchlist han PNP dida han mao nga lugar.
Han ginbuhat nga buy-bust operation, narekupo tikang kan Guillermo in usa ka sachet hin gin-aalegar nga shabu nagkakantidad hin usa ka yukot ka pesos.
Samtang, dida naman han Abril 2, 2020, nadakop han mga kapulisan han San Jose Police Station han Tacloban hira Gesulino Padillo, 33 anyos, taga Tigbao, Tacloban; ngan Roel Reandino, 41 anyos.
Nakwelyuhan an duha nga suspetsado ha usa gihapon nga buy-bust operation kun diin nakuha tikang ha ira in tulo ka sachet hin gintatahapan nga shabu balor hin 10 mil pesos.
An nasabi nga mga suspetsado in preso na yana ngan nakatalaan umatubang han kaangayan nga kaso kontra ha ira. #
(Posted 9:10 AM, April 3, 2020)
