Nagmando an barangay kapitan han Dasmarinas, Makati nga mag quarentina hi Senador Manny Pacquiao ug an iya bug-os nga pamilya ha sulod han ira balay didto han ira subdibisyon nga gin-uukyan gihapon hin mga rikuhanon ngan kilalado nga mga personalidad.
Hi Brgy Chairwoman Rossana Hwang in nagpadara hin surat kan Pacquiao yana nga kulop, nagmamando nga deri mag ginawas-gawas an bisan hin-o nga kaapi han iya sulod balay katapos madiskubrehan nga hi Senador Koko Pimentel in umatender hin usa nga party ha balay ni Pacman hadton Marso 4. Kun aton manunumduman, hi Pimentel in nag positibo han COVID-19.
Nagsering an kapitana nga kinahanglan magin modelo an senador ngan sikat nga boksingero ha katawhan ngan iya igpakita nga nasunod hiya han mga aludayday kay ginkokonsiderar yana hiya nga Person Under Monitoring (PUM) pati na gihapon an ngatanan nga nag-uukoy ha iya balay.
Kasumpay hini, an barangay in nagbutang hin security personnel ha gawas han balay han senador basi mabantayan an bug-os nga pamilya ngan maseguro nga masusunod an katorse ka adlaw nga quarentina.
Nagpatapod naman an kapitana nga magtutudlok hira hin mga tawo nga amo an puede masugo han pamilya Pacquiao kun mayda nira igpapapalit nga mga kinahanglan ha gawas. #
(Posted 7:52 PM, March 27, 2020)
