Deri na magkakamay-ada hin final examinations para han school year 2019-2020 an mga estudyante ha pam-publiko nga mga eskwelahan ha elementarya ngan high school.
Ini an iginpasamwak ni DepEd Regional Director Ramir Uytico komo usa han mga pitad han ahensya ha paglikay nga magsinarang pa an ginkakahadlukan nga COVID-19. Nagsering hi Uytico nga an pag-compute han mga grado han mga estudyante in bubuhaton han mga magturutdo ha ira tagsatagsa nga balay ngan ini in igpapatamak han nagin performance han estudyante tobtob han pagsuspender han mga klase.
Iginpahayag pa ni Uytico nga posible gihapon nga kanselaron nala an mga aktibidadis kasumpay han moving-up ngan graduation ceremonies.
Para naman han private schools, puede nira pagsundon ini nga pitad han pampubliko nga eskwelahan, pero kun mayda nira iba nga paagi puede nira himoon basta para han beneficio han mga estudyante.
Samtang, ginbubuhat han DepEd an ngatanan nga ira mahihimo basi makarawat na han ngatanan nga ira personales an sweldo han Marso upod an advance salary para han Abril. Subay han impormasyon tikang ha DepEd Central Office, nagmando na hi Secretary Leonor Briones ha ngatanan nga regional directors nga areglaron an ngatanan nga rekesitos para hini nga panuyu-anan.
An duha ka bulan nga sweldo in nakatalaan karawaton han haros usa ka milyon nga personales han departamento nga ginlalakipan han regular/plantilla employees, contract of service ngan consultants.
Labot la han duha ka bulan nga sweldo, ginmamalahimo nga mabukalsan na gihapon an clothing/uniform allowance, Performance Based Bonus han 2018 ug an hazard pay. Sumala pa han impormasyon, an DepEd in nagpadangat na hin request ha Department of Budget and Management para hini nga pitad. #
