Malaum-laum nga notisya para han mga miembro han Government Service Insurance System (GSIS) nga may mga anak nga na-eskwela ha kolehiyo, kay an ahensya in magpapagawas hin suporta pinansyal para han mga estudyante.
Sumala kan Tacloban GSIS Branch Manager Junjie Ponay, iglulunsad yana nga Marso an GSIS Educational Support Program (ESP) nga an panuyo in makabulig ha mga GSIS members ha ira kagarastuhan ha pagpa-eskwela han ira mga anak ha kolehiyo. Ha ilarum hini nga programa, an mga college students nga anak han GSIS members in matatagan hin tag 10 mil pesos nga ayuda.
Ginklaro naman ni Ponay nga kinahanglan an tatay o nanay han estudyante nga active GSIS member ug deri malapos ha Salary Grade 24 an sweldo. Nagsumat pa an opisyal nga ini nga hinabang in para han mga GSIS members nga deri hitaas an sweldo. Nagpahayag pa hiya nga one-time la ini nga financial support ngan deri pa pa hiya maaram kun may sugad pa hini nga programa sunod nga tuig.
Iginpahayag pa ni Ponay nga kinahanglan nga ini nga mga college students in aada ha mga eskwelahan nga may akreditasyon han Commission on Higher Education (CHED).
Sumala pa han impormasyon, yana nga Marso an formal launching hini nga programa ngan ginpapa angan-angan la an mga natutungdan nga members han kadugangan pa nga detalye hini nga programa. #
