Guin sumat ni Leyte provincial Treasurer Gerardo Avorque nga mayda sobra 2 Billion pesos nga real property tax nga sinusukot an muncipyo han Kananga tikang ha Energy Development Corporation (ED) ngan Greencore tikang han tuig 2008 tubtub 2019.
Pero sumala pa kan Avorque nga waray pa klaro kon pira gud an eksakto nga kantidad han babayran pa nga buhis han duha nga kompanya o kon may babayaran pa ba gudman mahitungod nga naka talaan pala ini nga panginanoon han local government of Kananga ngan han iya opisina.
Sumala pa haiya nga nagkaada na hira hin meeting parti hini upod an municipal assessor han Kananga nga hi Virgilio Tiu ngan Treasurer Susan Del Monte ngan hira in nagka sarabot nga magsurat hi Kananga Mayor Matt Torres kan Leyte Governor Mic Petilla agud mag porma hin task force nga mag dudumara han imbentaryo han mga planta ngan equipment ngan han mga improvements han mga propyudad nga subject han sinusukot nga buwis han munisipyo.
Nag patapod hi Avorque kan Mayor Torres nga an iya opisina in mabulig pinaagi han pag hatag hin mga dokumento nga mag sisirbe nga basehan han pag imbestigar han alegasyon han munisipyo han Kananga.
Pirme nag babayad han ira real property tax kada tuig an duha nga kompanya pero pirme ini “payment under protest” mahitungod nga deri pa klaro kon pira gud an ira babayaran mahitungod kay mayda liwat balaod nga amo an renewable energy act nga nag hahatag hin special tax rates ha mga kompanya nga an negosyo in may kalabutan han pag develop hin “renewable energy”
Ha ilarom han mao nga balaod nga guin patuman hadton 2009, deri dapat lumapos hin 1.5 percent han assessed value han mga real properties han mao nga mga kompanya an babayaran nga real property tax. Hinuhulat pa an desisyon han Local board of assessment appeals kon pira gud an babayaran nga buhis han duha nga kompanya dugang pa ni Avorque.
Kada tuig nabayad hin tag sobra 100 million nga real property tax an mao nga mga kompanya ha probinsiya han Leyte.
An energy Development Corporation ngan Greencore amo an nag tatag iya han mga geothermal plant ha ha may parti han Kananga ngan ormoc nga guin dudumara han Lopez Group of Companies.
