Ipapatawag han Sangunian Panglunsod han Tacloban an mga opisyales han Leyte Metropolitan Water District ngan han Prime Water Infrastructure Corporation agud mag esplikar an mga detalye parti han natabo nga joint Ventures ngan an plano nga pag umento han taripa han tubig.
Sumala kan Tacloban City Vice Mayor Jerry “Sambo” Yaokasin nga ini in subay han surat nga nakarawat han Sangunian tikang kan Pete Ilagan nga nahangyo han Sangunian Panglunsod nga panginanoon an natabo nga partnership han LMWD ngan Prime Water.
Guin tagan na hin direktiba ni Yaokasin hi konsehal Nikki Chua an Chairperson han Committee on Franchises, Banks and utility nga ihatag an surat ni Ilagan ha Sangunian Panglunsod agud opisyal nga mabutang ha agenda hiton masunod nga sisyon.
Ha ilarom han joint ventures an Prime Water na an mag dudumara han operasyon han LMWD samtang an trabaho nala han LMWD Management an pag siguro nga magtutuman an Prime Water han mga obligasyon hini subay han ira kontrata.
