Waray gud pahuway iton magraot nga elemento ha pan biktima hit igkasi tawo bisan pa man naatubang kita yana hin dako nga problema mahitungod han COVID-19. Ngan bisan nagpapadayon it mga otoridad pagsagdon ha publiko nga deri magpahugay hin mga mensahe ha text nga kuntaloy nakadaog hin dako nga premyo, damo la gihapon an na-oowat han text scam.
Usa na denhi an technician nga taga Kassel Homes, Tacloban City nga nagpa-blotter ha Abucay Police Station nga naanaw an iya sobra 90 mil pesos ngadto hin mga suspetsado pinaagi la hin mga text messages. Dida han Pebrero 20, nakakarawat hin text message an 27-anyos nga ulitawo nagsusumat nga nakadaog hiya hin 400 thousand pesos ha usa nga raffle hin produkto ngan kinahanglan niya ini kuhaon komo iya na ini premyo. An mensahe han text in tikang daw kanda Jerry ngan Miguel Lopez.
Nagbaton han text an biktima ug ginsidngan hiya nga makukuha niya an 400 mil pesos pero kinahanglan magpadara hiya hin service fee nga tres mil pesos. Iya ini gintuman ngan nagpadara hiya pinaagi hin remittance center ha Brgy 74, Tacloban.
Paghagos hin pira ka adlaw, nag text na liwat an parehas nga cel number tikang han kunohay mga Lopez nag-aaro hin kadugangan nga singko mil pesos ngan sumugot na liwat an biktima pagpadara. Nagpadayon an pag-inaro ha iya hin kadugangan pa nga salapi, ngan mayda ngani adlaw nga nakagpadara hiya hin 30 mil pesos. Usahay napaki-ana an biktima kun kay-ano nga kinahanglan pa hin dugang nga padara ngan pirmi iginrarason han mga suspetsado nga amo gud ini an proseso basi makuha niya an premyo.
Ha dagmit nga sumat, inabot ngatanan hin 92 mil pesos an iya nahipadara ngadto han iya mga ka-transaksyon ngan dida han Marso 15 an iya urhi nga money remittance. Dida hini nagduda na hiya nga sugad-sugad nga waray nahihingadtu-an an pag-claim han iya premyo. Iya gintawagan an numero, pero waray na ini babaton tobtob nga waray na gud makokontak.
Pinmakadto hiya han remittance center ngan iya ginpanginano kun mayda gud man nag-claim han iya mga iginpadara. Nalutaw an ngaran nga Pumar Musa nga amo an claimant ngan ginkuha an iya mga padara ha Bagong Lipunan, Sultan Kudarat, Cotabato. An mobile number nga gingamit han pag text ha iya in 09997249427. #
(Bisan kun an pangilal-an han biktima in nahipapatik ha police blotter, nagdesisyon an tagsurat hini nga notisya nga deri na hiya ngaranan.)
