Nagdurot hin dako nga paglaum an nagin resulta han ika-upat nga batch hin samples nga iginpailarum han COVID-19 laboratory testing.
Dida han iginpagawas nga pahayag kakulop han DOH-Regional Office, malipayon nga ira iginsumat nga ngatanan han siyam nga samples (4th Batch) nga iginpadara ha Vicente Sotto Memorial Hospital and Medical Center in negatibo han makamaratay nga kagaw. Ini nga mga samples in ginkuha tikang hin siyam nga Persons Under Investigation (PUI) ha aton rehiyon.
Pero ginklaro han DOH nga bisan kun makalilipay ini nga resulta, kinahanglan nga deri la gihapon kita tumagya ngan igpadayon an nabatasanan nga paglimpyo han lawas ngan iba pa nga mga pitad ha pagsupil han corona virus.
Samtang, usa naman nga PUI an namatay ha usa nga hospital ha Tacloban dida han gab-i han Abril 1, 2020. Ini nga pasyente in binawi-an han kinabuhi dara han respiratory failure subay han nahipapatik han death certificate nga iginpagawas han hospital.
Tobtob han kamatay hini nga PUI, waray pa kasabti kun positibo o negatibo hiya han corona virus tungod kay waray pa umabot an resulta han iya swab testing. Ginkuhaan hiya hin sample hadton Marso 31 nga amo an iya paghisulod ha hospital ngan iginpadara ha Cebu ini basi matestingan pero tobtob kakulop waray pa resulta.
Sumala pa han City Health Office, iginlubong na an patay nga lawas han pasyente pagkabuwas la komo pagsunod han protocol han DOH. Ginsumatan na gihapon an pamilya ug an mga lider han barangay kun diin nag-uukoy ini nga PUI basi makaghimo hira han kaangayan nga mga aksyon. #
(Posted 7:23 AM, April 3, 2020)
