Tacloban City -Guilty han kaso nga Grave Misconduct hi Southern, Leyte Governor Damian Mercado ngan lima pa nga iba hinungdan nga guin dismiss ini ha serbisyo han Ombudsman.
Nag ugat an kaso mahitungod han ma anomaliya nga panmalit hin second hand nga mga sarakyan ha Kojac Auto Repair Shop nga nag kakantidad hin 2.3 Million pesos hadto tuig 2007 han hiya pa an Mayor han Maasin City.
Guin talapas ni Mercado an mga Patakaran han pamalit hin mga segunda mano nga mga sarakyan sugad han Department of Budget and Management National Budget Circular No. 446-A ngan Government Procurement Reform Act (Republic Act No. 9184).
Nasabutan han ombudsman han ira imbestigasyon nga sobra 10 years an mga pinalit nga mga sarakyan ngan waray umagi han eksakto nga proseso han pamalit han mga ini sugad han pag advertise agud magka ada hin competetive bidding.
Upod nga guin dismiss ha serbisyo hira Bids and Awards Committee (BAC) Chairman Crispin Arong, Jr., BAC Vice-Chairperson Feorillo Demeterio, Jr.; BAC members Anecito Narit, Benjase Lumen ngan Consuelo Ladrera; ngan supplier Baltazar Avila, Sr. han Kojac Auto Repair Shop and Auto Supply.
Labot la han dismissal order an mga akusado in deri na pwede magtrabaho ha gobyerno bisan san-o, deri na liwat makaka karawat han ira mga benipisyo sugad man an pag bawi han ira civil service eligibility.
Hira in na atubang pa hin kaso kreminal ha Sandiganbayan dara han paka talapas han Anti Graft and Corrupt Practices Act. (isumat.com)
