Isumat.com/2:26PM, April 21, 2020
Labot la han ira obligasyon ha pagmentenar han kamurayawan ngan pagbantay ha mga COVID-19 checkpoints, naghimo pa hin iba nga pitad an Philippine National Police nga makahatag hin ayuda pinansyal para han mga nagkinanahanglan nga mga kablas ha panahon han krisis.
An PNP-Eastern Visayas in nakatirok na hin 8, 626, 275 pesos tobtob yana nga adlaw (Abril 21, 2020) para han ira proyekto nga Bayanihan Fund Challenge. Ini nga proyekto in may panuyo nga suportaran an Social Amelioration Program.
Dida hini nga proyekto, gin-awhag an ngatanan nga personales han PNP, bisan ano man an iya ranggo o posisyon, nga boluntaryo magdonar hin kaparte han ira sweldo basi makabulig han mga kablas. Ini an nagin kabatunan han PNP han panawagan ni Presidente Duterte ha ngatanan nga sektor nga magburubligay basi matagan hin hinabang labi na gud an pinaka pobre nga katawhan.
Sumala kan PNP 8-Regional Director BGen Bernabe Balba, an mga personales han kapulisan ha Eastern Visayas in nakikig-usa ha gobyerno ha panlimbasog nga mapagaruga-an an ginpapas-an yana nga krisis.
Ini nga boluntaryo nga donasyon in tikang han mga opisyales ngan personales han Regional Office, Regional Headquarters Support Unit, Police Provincial Offices, City Police Offices, ngan Regional Mobile Force Battalion.
Hadton Abril 14, hi PNP Chief Archie Gamboa an naglunsad hini nga proyekto ha Campo Crame ngan kadagmitan naman nga nagbaton an PNP-Eastern Visayas salit nakatirok na hira hin sobra 8 milyones pesos tobtob yana nga adlaw.
An PNP in nagdumara na gihapon hin panhatag hin mga relief goods ngadto hin mga kablas ha magkalainlain nga parte han rehiyon pinaagi han ira proyekto nga “Kapwa Ko, Sagot Ko.” #
