Isumat.com/8:23AM, October 31, 2020
Nabitay na an patay nga lawas han 64-anyos nga lalaki han makit-an ini han iya misis kakulop, Oktubre 30, ha kwarto han ira balay ha Kassel City, Brgy 71, Tacloban City.
Dida han impormasyon tikang ha Abucay Police Office, an biktima in ginkilala nga hi Jose Biduya, may asawa ngan residente han nasabi nga lugar. An misis han biktima in nagsumat ngadto han mga otoridad nga nadiskubre niya an pagpakamatay han iya bana pasado alas 5 han kulop.
Sumala han report, waray nakasabot han pamilya han biktima han iya plano tungod kay nanngaturog an iba nga miembro han pamilya hadto nga kulop. Hi Biduya in naghikog didto han ira kwarto.
Waray nahitad-an nga suicide note o nakabati hin mga pahayag tikang han biktima mahitungod han iya plano. Pero sumala han misis, han nag-agi nga pira ka semana nag-iinarungot hiya tungod hin deri ma-antos nga kama-ol-ol nga iya inaabat ha lawas.
Ini an ikaduha nga adlaw nga may nagpakamatay ha Tacloban. Dida han Oktubre 29, an 21-anyos nga ulitawo in naghikog didto han ira balay ha Brgy 72. Ini in sapit la nga barangay han gin-uukyan han bag-o nga nag-suicide kakulop nga lagas. Waray pa katutudlok han mga imbestigador an rason han pagpakamatay hini nga ulitawo.;
An ulitawo nga biktima in sangkay han 25-anyos nga lalaki nga taga Palo, Leyte nga naghikog gihap hadton Setyembre.
Tikang han pagbutho hini nga pandemya, haros mayda duha o tulo ka tawo an nahireport nga nagpapakamatay kada bulan ha Eastern Visayas ngan kasagaran han mga biktima in kalalakin-an. #
