Isumat.com/Mayo 4, 2021
Unom nga kalalakin-an an nanhipaslar ha karsel tungod han ira iligal nga panakop hin halo (bayawak ha Tagalog; Monitor lizard ha English) ha Dulag, Leyte.
Ginkilala an mga suspetsado nga hira, Jomarie Custodio, 21 anyos; Jonel Cadaro, 22 anyos; Erwin Perez, 38 anyos; Jeffrey Cadaro, 27 anyos; Henry Custodio, 50 anyos; ngan Nasario Perez, 41 anyos. Hira in mga residente han Brgy Bagacay East, La Paz, Leyte.
Sumala han report, an mga opisyales han Brgy Tabu an nakabuksot han unom nga suspetsado nga nakadakop hin 11 nga halo kun diin unom hini in buhi pa ngan patay na an lima. Kadagmitan nga iginpahibaro ini ha Dulag PNP.
Pumakadto dayon han barangay an kapulisan ngan gin-aresto an mga gintatahapan. Nakatalaan sampaan an unom nga kalalakin-an han kaso nga pagtalapas han Republika Acta 9197 o tinatawag nga Conservation of Wildlife Resources and their Habitats.
An halo in ginkokonsiderar nga “endangered species” sanglit protektado ini han balaud.
Damo an natoo nga an pagkaon han halo labi na an dugo ug an lana tikang hini nga hayop in nagdadara hin “aphrodisiac properties” ngan nakakatambal hin mga sakit. #
