Isumat.com/8:05AM, Marso 19, 2021
Tungod han kooperasyon ngan panlimbasog nga mawara ha ira lugar an presensya ngan impluwensya han mga rebelde nga komunista, unom nga mga barangay ha Northern Samar an makakatagamtam hin tag-20 Milyones pesos kantidad hin mga proyekto.
Ini an nasabutan durante han katitirok han mga kaapi han National ngan Regional Task Force on Ending Local Communist Armed Conflict (NTF-ELCAC) nga gindumara ha Tacloban City kakulop, Marso 18. Ini nga miting in ginpangunahan nira Presidente Duterte ngan National Security Adviser Hermogenes Esperon.
Hi Esperon in nagpasamwak nga an unom nga barangay in namumutang ha Catarman ngan Catubig ha Northern Samar. An nasabi nga pondo in ha ilarum han programa nga Barangay Development Program han NTF-ELCAC. An mao nga mga barangay in nakatalwas na tikang ha panlupig han CPP-NPA sanglit angay la nga humurak ha ira an ayuda basi mapa-uswag an ira tagsatagsa nga lugar, pahayag pa ni Esperon.
Dida han kada barangay nga benefeciario, an 20 Milyones pesos in pagbabatag-batagon para han masunod nga mga proyekto: 12 Milyones- Farm to market roads; 3 Milyones – School buildings; 2 Milyones – Water and Sanitation system; 1.5 para han elektrisidad; ngan 1.5 para han Health Stations.
Iginproponer gihapon ni Esperon ngadto kan Duterte nga sunod nga tuig, katagan hin parehas hini nga hinabang an maabot 200 nga barangay ha Eastern Visayas nga waray na presensya an CPP-NPA.
Nagsumat naman hi Philippine Army 8th Infantry Division Commanding General Pio Dinoso III nga denhi ha Sinirangan Bisayas, 62-porsyento na han mga bungto ngan syudad an nagdeklarar han CPP-NPA nga persona-non-grata ha ira mga lokalidad.
Pinaagi han nasabi nga mga programa ngan proyekto, naglalaum an gobyerno nga masusupil ngan dayuday na nga mawawara an komunista nga kagi-usan ngan armado nga aragway ha Pilipinas nga pira na ka dekada nga nakaka-apekto ha pag-uswag han nasud. #
