Isumat.com/Nobyembre 1, 2021
Maabot hin tunga hin milyon nga menor-de-edad denhi ha Rehiyon Otso an gintatargat han DOH-Regional Office nga panbabakunahan basi masurapo an Covid-19.
Dida han panmaki-ana han iFM-RMN Tacloban hadin nakalabay nga adlaw, iginpahayag han DOH nga an pangidaron nga 12 tobtob 17 anyos ha Eastern Visayas in naabot hin kinyentos mil, subay han gibabag-uhi nga record han Philippine Statistics Office.
Yana nga Nobyembre, ma-arangkada na an pagpahi-agom han bakuna para hini nga kabataan. Nakatalaan nga an babakunahan ha syahan nga semana han bulan an haros dos mil nga kabataan. Hira in naha-una nga ipinanlista tungod kay mayda nira gin-aantos nga mga comorbidities o sakit.
Ini nga kabataan in panbanbakunahan ha Eastern Visayas Medical Center, Leyte Provincial Hospital ngan Schistosomiasis Hospital ha Palo.
Iginpahayag pa han DOH nga an mga brand han bakuna para han kabataan amo an Pfizer ngan Moderna.
Ha Tacloban City, gin-aghat han City Health Office an mga kag-anak nga igparehistro an ira mga anak nga waray comorbidities ha safecity.tacloban.gov.ph.
Para han may mga sakit, kinahanglan igpalista hira ha mga Health Centers o ha City Health Office mismo.
Para naman han iba nga lugar, gin-aaghat han DOH nga makigsumpayan ha ira tagsatagsa nga munsipyo para han proseso ngan detalye han panbakuna.
Ginhihingita han DOH nga matatapos an panmakuna han kabataan yana nga 2021.
Ginklaro pa han ahensya han panlawas nga magpapadayon an panmakuna han edad 18 anyos ngadto ha igbaw. Tobtob han Oktubre 28, inabot na ha 20 porsyento ha target nga populasyon han rehiyon an nakatagamtam na han Full Vaccination. #
