Isumat.com/6:03AM, December 12, 2020
Nagtikang na pagbakdaw an industriya han turismo ha Rehiyon Otso tikang han grabe nga epekto han Covid-19 Pandemic sumala kan Karina Rosa Tiopes, Regional Director han Department of Tourism.
Ha pakighimanghaw han Isumat.com, nagsumat hi Tiopes nga 50% na han mga Tourist Destination ha Sinirangan Bisayas an bumalik na ha operasyon hadin nag-agi nga pira ka semana. Pero iya ginklaro nga an gintutugutan nga pumasyada ngadto hini nga mga lugar amo an mga “Local Tourist” la anay.
Karuyagsidngon hini, an mga residente han bungto kun diin namumutang an Tourist Spot ngan residente han paghagrani nga munisipalidad amo la an puede pumakadto. Ini nga pitad in agud kalikayan nga magsinarang pa an virus, sering pa han Regional Director.
Iginpahayag pa han opisyal nga an Probinsya han Samar ngan usa nga bungto ha Southern Leyte an nagpadangat na hin request ha Regional Covid Task Force nga tugutan hira nga kumarawat hin mga turista tikang ha magkalainlain nga parte han rehiyon.
An Samar Province in nanlilimbasog nga makatukdaw na an turismo ha ira lugar ngan bisan kun may pandemya, nagpadayon an pagpahusay han ira Tourist Spots nga ginlalakipan han Olot River Adventure, ug an aabrihan nga San Juanico Bridge Aesthetic Lighting Project.
An LGU-Padre Burgos ha Southern Leyte in maniningkamot gihapon nga abrihan na an ira mga Diving Sites para han mga turista tikang ha iba nga lugar.
Kasumpay hini, utro nanawagan hi Tiopes ha lokal nga mga turista nga pirmi gud obserbaran o tumanon an mga patakaran o Health Protocols kun mapasyada ha mga Tourist Destination basi hul-os nga maproteheran an ngatanan tikang han virus. #
