Isumat.com/Disyembre 2, 2021
Tikang han Nobyembre 4 tobtob Disyembre 1, 2021, lima ka tawo ha Eastern Visayas an nagtiwas han ira mga kinabuhi.
Kakulop, Disyembre 1, usa nga batan-on nga iroy ha Pastrana, Leyte an natad-an nga nabitay na an lawas ha ira balay.
Subay han inisyal nga imbestigasyon, an 17-anyos nga babaye in nagpakamatay pinaagi han paghigot hin sinturon ha iyo liog ngadto hin kahoy. Gintutudlok nga problema pinansyal an rason han panhitabo.
Antis an pagpakamatay, ginpruybahan pa han biktima nga pagtilo-on an iya anak pero napudngan ini han bugto han iya mister ngan gindara an bata ha sapit nga balay.
Paghagos hin pira ka minutos, bumalik ngadto han balay han biktima an iya bayaw basi kumuha hin tsupon, ngan didto natad-an niya nga nabitay na an lawas han biktima. Kadagmitan gindara ha RHU an batan-on nga nanay pero igindeklarar nga dead on arrival.
Hadin nag-agi nga semana, iginreport han PNP Regional Office an pag-suicide han masunod : 16 anyos nga estudyante ha Villareal, Samar; 20 anyos nga estudyante ha Baybay City; 26 anyos nga estudyante ha Naval, Biliran; ngan 64 anyos nga byudo ha Sogod, Southern Leyte. #
