Isumat.com/Hunyo 17, 2022
Haros tunga hin Milyon ka pesos nga kantidad hin iligal nga droga an nakumpiskar han mga tinubyanan han balaud ha Eastern Visayas dida han ira gindumara nga usa ka semana nga Simultaneous Anti-Criminality Operations ha bug-os nga rehiyon hadton Hunyo 6-12, 2022.
Dida han pahayag han PNP Regional Office, balor hin 459, 325 pesos an balor han shabu nga ira narekupo ngan ini in may kabug-aton nga 70.14 grams.
Dida han nasabi nga mga operasyon, 28 ka tawo an nagka-aaresto nga ginlalakipan ini hin 19 nga nakalista nga drug personalities ngan 9 nga waray dida han ira listahan.
Mayda gihapon siyam ka tawo nga nagkumpisal nga drug users hira ngan boluntaryo nga nagsurender ha magkalainlain nga police stations.
An gidadaku-i nga kantidad hin shabu an narekupo ha usa nga buy-bust operation ha Albuera, Leyte hadton Hunyo 12, 2022 kun diin nadakop an 21-anyos nga suspetsado ginkilala nga hi Alfredo Eligio nga taga Brgy Talisayan han mao nga bungto.
May timbang nga 55 gramos ngan balor 374 Mil pesos an shabu nga nakuha tikang ha iya. #
