Isumat.com/8:03AM, December 30, 2020
Bisan kun iginpasamwak han PNP Regional Office nga nagin mamurayaw an pagsaurog han Pasko ha Sinirangan Bisayas, mayda la gihapon pira ka tawo nga nakasupak han balaud labi na gud an pagpabuto hin pusil ngan pagbaligya han illegal firecrackers.
Dida han gindudumara nga kinada-adlaw nga monitoring han PNP, nahipatik in upat nga insidente tikang han Disyembre 21 tobtob Disyembre 29, 2020.
Hadton Disyembre 21, gin-aresto han kapulisan ha Maydolong, Eastern Samar hi Kagawad Nerie Lira, 48 anyos han Brgy Camparit. Narekupo tikang ha iya an ginpabuto nga pusil nga kalibre .45. Hapagkayana, padayon an imbestigasyon hini nga panhitabo.
Didto ha Brgy Carayman, Calbayog, gin-aalegar nagpabuto hin pusil an nadakop nga suspetsado nga hi Julito Botron, 37 anyos, residente han mao nga lugar. Natabo an insidente pasado ala 11 han gab-i, Disyembre 23. Nakuha tikang ha iya in usa nga 9mm nga pistola ngan tulo nga bala. Dida han duha nga panhitabo hin pagpabuto han pusil, waray nahireport nga naigo han layaw nga bala, pahayag pa han PNP.
Duha naman katawo an nadakop ha magkalain nga operasyon han kapulisan kontra han iligal nga paburuthon ha Carigara ngan Bato, Leyte. Ini in natabo Disyembre 29 kun diin nagkakantidad hin 50 Mil pesos an mga paburuthon nga narekupo tikang han duha nga suspetsado.
Nagpapabilin naman nga tobtob han Disyembre 29, waray pa nahireport nga mga nagkadadara ha hospital ha bug-os nga Region 8 tungod hin Fire-craker related injuries. #
