Isumat.com/Hulyo 25, 2022
An mga banggi-itan nga magmurulay han 3X3 Basketball ha bug-os nga Sinirangan Bisayas in magkukumbati dida han Golden Tiger Basketball Challenge Season 2 ha Robinsons North, Tacloban City hiton Hulyo 29-31, 2022.
Dida hiton Hulyo 29 ngan Hulyo 30 paghihimoon an elimination round para han Open Category kun diin sobra 30 nga teams an mag-aarasdangay.
Pag-abot han Hulyo 31, makaladkad an mga engkwentro kay pagdudumaraon na an semifinals ngan championship matches para han masunod nga mga dibisyon: U-13, U-16, U-18, U-21, Womens Category ngan Open Division.
An mga semifinalists han U-13, U-16, U-18 ngan U-21 in naha-una na nga nagkapipili tungod kay gindumara na an elimination round hini nga mga kategorya han nag-agi ngan yana nga semana, antis an pa-isan-isan didto ha Robinsons North.
Sobra na duha ka tuig an nakalabay han paghimoon an 1st Season han torneo ngan plano unta hadto nga sagunson na an mga kompetisyon han Golden Tiger 3X3, ugaring la kay na-apektaran han pandemya amo nga yana pa an Season 2.
Ini nga torneo in aada ha ilarum han superbisyon han Samahang Basketbol ng Pilipinas. An Golden Tiger Power Solutions Inc amo an panguna nga nagpapaluyo han kompetisyon, lakip na gihapon an kadam-an nga private sponsors. #
