Isumat.com/Hulyo 15, 2022
Naawat an kinabuhi hin tulo nga mga miembro han terorista nga New Peoples Army dida hin asdangay kontra han mga tropa han Philippine Army ha San Jorge, Samar hadin Hulyo 8 ngan Hulyo 13, 2022.
Sumala kan Capt Ryan Layug, tagyakan han 8th Infantry Division, an mga namatay in gintotoohan nga kaapi han grupo han mga rebelde nga responsable han pagpabuto hin mga bomba nga igintanum ha tuna kun diin pira nga mga sundalo an nagkasasamad.
Kun aton manunumdoman, pito nga sundalo an nagkasasamad han pabuthon han mga rebelde an landmine didto han ginbabaktasan nga dalan han mga tropa han gobyerno ha Brgy Magsaysay, Mapanas, Northern Samar han una nga semana.
Tungod hadto nga panhitabo, naghdumara hin waray tukal-tukal nga paghalpat an mga sundalo han grupo han mga rebelde ngan gingamitan pa ini hin drones ngan moderno nga mga higamit han militar basi la matudlok kun nagtikain an mga kumunista.
Subay han pahayag ni Layug, nagkaada hin engkwentro ha kabubkiran han San Jorge Samar kun diin ngadto pangalagiw an mga NPA katapos han ira pamomba ha Northern Samar.
Dida han purupusilay, duha nga kalalakin-an ngan usa nga babaye nga mga miembro han NPA an nagkamamatay ngan dida la han nag-agi nga adlaw nakuha han miilitar an mga patay nga lawas. Hinsabutan pa nga iginlubong nala an mga casulaties ha Poblacion San Jorge kay nadudunot na an mga patay nga lawas.
An mga Black Hawk chopper han militar an gingamit ha pagkuha han mga patay nga lawas tikang han lugar han pag-agwayan.
Dida gihapon han lugar han engkwentro, narekupo han mga sundalo in tulo nga M16 rifles, usa nga AK-47, shotgun, Anti-Personnel Mines, election campaign materials ngan mga dokumento.
Gintotoohan nga ini nga mga NPA rebels in kaparte han Yakal Platoon nga ginpapamunuan ni Ka Bart.
Nagsering naman hi MajGen Edgardo De Leon, 8th Infantry Division Commander, nga segurado mayda pa masunod nga mga enkwentro ha tay-aw nga mga lugar kay deri mahunong an mga kasundaluhan paglanat han mga rebelde.
Sering pa han heneral, deri na makakaharani ha mga kumunidad an mga rebelde kay iginkakaderi na hira han mga baryuhanon tungod han bayolente nga ira mga binuhatan. #
