Isumat.com/Agosto 30, 2021
Humagos anay hin sobra tulo ka tuig tikang igpagawas an warrant of arrest han korte antis nakwelyuhan han mga kapulisan in tulo nga magburugto nga naatubang hin kaso nga panlugos o rape.
An mga akusado nga nagkadadakop denhi ha Tacloban City amo an magburugto nga hira Darel Prangan, 23 anyos; Justin Dave Prangan, 22 anyos; ngan Dexter Prangan, 21 anyos. Hira in mga residente han General Trias, Cavite ngan temporaryo nag-uukoy ha Lions Village, Tacloban.
Hira Dexter ngan Justin Dave in na-aresto alas 4 han kulop, Agosto 28 ha Brgy 80, Marasbaras, Tacloban; samtang hi Darel in nasikmit alas 4:40 han kulop han nasabi nga petsa ha Brgy 60, Sagkahan District.
An pag-aresto han magburugto nga Prangan in bunga han kamanduan ni Judge Bonifacio Pascua han RTC-Branch 23, Trece Martires, Cavite hadton Hunyo 25, 2018 tungod hin kaso nga panlugos.
Waray iginrekomendar nga piyansa para kan Darel samtang an iya duha nga bugto in puede makagpiyansa hin tag 200 Mil pesos.
An mga operatiba han Tacloban City PNP an nagdumara han pag-aresto. Gin-aandam nayana an pagproseso han mga dokumento basi igtubyan an mga akusado ngadto han husgado ha Cavite nga mayda hurisdiksyon han ira kaso. #
