Isumat.com/6:47AM, October 30, 2020
Ha deri maiha nga panahon, mahuhuman na an konstraksyon han tulo ka andana nga Terminal Building ha Abucay, Tacloban City.
Nagpahayag hi DPWH Tacloban District Engineer Arnaldo Bonifacio nga an target unta hini nga matatapos an proyekto dida hiton Nobyembre 30, pero tungod han pagkulang usahay hin mga magtatrabaho ngan kadelatar han materyales tungod han pandemya, adto na ini mahuhuman hiton Disyembre.
Kun matapos na an nasabi nga proyekto, ini an igtutubyan han ira ahensya ngadto ha City Government han Tacloban nga amo na an magdudumara han terminal.
An nasabi nga facilidad in nagkakantidad hin porlomenos 155 Milyones pesos ug an nasabi nga pondo in tikang han General Appropriations Act han 2020. Nagsering hi Bonifacio nga nahilakip an pondo dida han National Budget yana nga tuig tungod han paningkamot ni Leyte 1st District Congressman ngan House Majority Leader Ferdinand Martin Romualdez.
Kasumpay hini, nagpatapod naman hi Bonifacio nga garantisado an mga materyales ngan kalidad han facilidad sanglit akos han istraktura nga paradahan han magbug-at nga mga sarakyan. An ground floor an magseserbe nga terminal han mga bus, samtang an mga van ngan deri gud dagko nga behikulo an ma-okupar han ikaduha ngan ikatulo nga andana.
Kun aton manunumduman, ginhurikas han Bagyo Yolanda an daan nga facilidad ngan nagin mapaso ngan mayamu-it an terminal tungod kay nawarayan atop. Ini nga 3-level terminal parking amo an iginliwan han naguba nga estraktura.
Ginlalauman nga makakaghatag ini hin kontribusyon ha pagpadukwag han ekonomiya ngan turismo deri la ha Tacloban kundi pati na gihapon ha bug-os nga Sinirangan Bisayas. #
