Isumat.com/Agosto 12, 2022
Namatay in duha nga kalalakin-an ngan nasamad naman an usa pa nga biktima dida hin magkalainlain nga insidente ha Samar kakulop, Agosto 11, 2022 samtang gintitigamnan han probinsya an Samar Day.
Dida han alas 8 han aga, nahitabo in usa nga shooting incident ha Purok 3, Brgy Malopalo, Tinambacan, Calbayog City kun diin ginkilala an biktima nga hi Paquito “Kits” Debuton, inasaw-an, ngan residente han mao nga lugar.
Ha inisyal nga imbestigasyon, hi Debuton in naghihinagdaon ha duyan dida han iya natad han may umabot nga lalaki ngan gintawag an iya atensyon. Gindaop han biktima an suspetsado ngan nagkaada hira hin pira ka minutos nga pag-istorya, han tigda la pusilon han gintatahapan an biktima nga na-igo ha iya ulo.
An biktima in namatay mismo dida han lugar han panhitabo. Kadagmitan naman nga umiskapo an suspect sakay hin motorsiklo.
Didto naman ha Gandara, Samar, namatay hi Brgy kagawad Edison Casaljay han pagpusilon hin waray hikilal-i nga mga suspetsado pasado alas 10 han aga ha Brgy Balocawe han nasabi nga bungto.
An kapulisan in pira ka oras antis nahingadto han lugar tungod kay harayo ini hin duro tikang ha poblacion ngan waray paagi pagkadto kundi an pagbaktas la.
Tobtob yana, nagpapadayon an imbestigasyon basi makilal-an ngan matudlok an motibo han pagpatay kan Casaljay.
Samtang, nag-antos naman hin mga kasamdan ha lawas an Chief Tanod nga hi Eleuterio Robaro han pagtigbason hiya didto ha ira lugar ha Brgy Tubigan, Zumarraga, Samar alas 6 han gab-i hadto gihapon nga adlaw.
Ginkilala an suspetsado nga hi Inigo Padin, kagawad han nasabi nga barangay.
Ha inisyal nga imbestigasyon, hi Robaro in nag-iinayad han iya mga gamit han panagat han tigda umabot hi Padin ngan gintigbas hiya ngan naigo an tanod ha iya wala nga siko.
Nagpadayon hin pagpaninigbas an suspetsado, sanglit nagkaada hin mga kasamdan an iba pa nga parte han lawas han biktima tungod han iya panagang.
An suspetsado in na-aresto han kapulisan, samtang an biktima in gindara ha Samar Provincial Hospital basi pagtambalon. Gintutudlok nga an motibo amo an deri pagka-asya han biktima ngan suspetsado hin panag-iyahan hin tuna.#
