Isumat.com/July 19, 2020
Ginlalauman han LGU-San Jose de Buan sugad man han militar nga magtitikadamo pa an masurender nga kaapi han New People’s Army didto han nasabi nga lugar.
Ini in kataliwan la nga magsurender kan Mayor Joaquin Elizalde in duha nga miembro han rebelde nga kagi-usan hadyon Hulyo 15, 2020. Igin-turn-over hira han alcalde ngadto han 87th Infantry Batallion han Phil Army nga nakabase ha San Jose de Buan, Samar.
An mga bumalik ha piyod han balaud in ginkilala nga hira Honorio Dacles alias Uno ngan hi Sanny Maestre alias Gortiyo. Gin-angkon han duha nga kaapi hira han Milisya ng Bayan, Central Front Samar 1,Sub Regional Command Browser han CPP-NPA Eastern Visayas.
Hi Dacles in nagtubyan hin M14 nga pusil ngan mga bala samtang hi Maestre in nagtubyan hin M1 Garand Rifle ngan mga bala,
Dida han pagsurender, an LGU in dayon naghatag hin tag 50 Mil nga ayuda pinansyal ngadto han pamilya han mga rebelde ngan ha deri maiha nga panahon, ighahatag gihapon han gobyerno an kadugangan nga mga hinabang para han ira pagpakabuhi ngan mamurayaw nga pag-ukoy ha sosyedad.
Nagtotoo an militar nga kadam-an pa nga iba in masurender gihapon labi na yana nga tim-os an pakighimangraw ni Elizalde ngadto han mga NPA ngan supoorters nga bumalik na ha gobyerno ngan makatagamtam han mga kalunggnayan.
Sumala pa han report an mga bungtuhanon han San Jose de Buan in nagbuyagyag nga nga an mga rebelde nga kumunista in nagpipinanngaro hin buhis tikang han katawhan ngan mga negosyante , pero ini in klaro nga extortion o kotong segun pa han militar.
Hi Elizalde in nanawagan ngadto han mga rebelde nga singabuton an oportunidad nga magkaa-ada hin bag-o ngan mamurayaw nga kinabuhi labi na yana nga abri an mga kamot han gobyerno para ngadto ha ira ug damo an mga kaupayan nga ighahatag ha ira. #
