Isumat.com/7:50AM, September 25, 2020
Tungod han padayon nga paghitaas han ihap han mga Covid-19 Positive Cases, duha nga hospital ha Calbayog City an na-apektaran an operasyon ngan pagserbe han ira mga kliyente.
Mabidoon nga iginpasamwak han Calbayog District Hospital nga tulo han ira mga personales an natapnan han virus. Tungod hini, nagdudumara na yana hin disinfection ha ngatanan nga parte han hospital.
An mga nagkatatapnan nga Health Care Workers in kadagmitan nga igin-akomodar ha Isolation Unit ngan ginhihimo na an contact tracing.
Ha atubangan hini, iginpatapod han hospital nga magpapadayon an paghatag hin serbisyo ha publiko dungan han pagpasarig nga gintutuman nira hin hingpit an mga patakaran basi deri na magsarang pa an kagaw.
Samtang, temporaryo naman nga ginpasadhan an pribado nga Our Lady of Porziuncola Hospital Inc. (OLPHI) tikang Setyembre 24 tobtob Setyembre 28 basi maghimo hin disinfection. Pero nagsering an OLPHI nga mayda serbisyo ha laboratoryo, radiology, ultrasound, parmasya ngan dialysis clinic.
An Local Transmission han Covid in nagpapabilin ha Calbayog ngan kakulop, Setyembre 24, iginreport han DOH Regional Office an 14 nga bag-o nga kaso didto han syudad. Umabot na ha 104 an nagkatatapnan nga Calbayognon kun diin 49 an naka-recover ngan 1 an namatay. Mayda naman 90 nga Active Cases yana.
Ha bug-os nga Eastern Visayas, 4,419 na an nagpositibo ngan 3,745 (84%) na an nakatalwas. Tumalikod ha kadayunan an 41 nga pasyente han Covid. Hapagkayana, mayda 633 nga Active Cases. #
