Isumat.com/7:28AM, August 4, 2020
Duha nga Barangay Kagawad ngan tulo pa nga iba an na-aresto han mga kapulisan tungod han pagbaligya hin agarwood.
Ginkilala an mga suspetsado nga hira Diosdado Chiquillo, 27-anyos, kagawad han Brgy Combis, Abuyog; Anthony Austria, 31-anyos, kagawad han Brgy Kanmarating, Abuyog; Jevy Ecenar, 31, taga Brgy Sadok, Abuyog; Marry Ann Acuna, 18, Brgy Sadok; ngan Roan Mae Cabalsera, 18, taga Brgy 106, Tacloban City.
Dida han Domingo, Agosto 2, an mga suspetsado in nagbiyahe tikang ha Abuyog tikadto ha Marabut, Samar basi magbaligya hin agarwood ngadto han ira ka-transaksyon.
Usa nga indibiduwal an naghatag han impormasyon ngadto han kapulisan mahitungod hini nga aktibidad, sanglit han tibalik na an grupo tikang ha Marabut, ginsita hira ha San Juanico Bridge checkpoint ngan nadiskubre an pira ka bug-os han agarwood dida hin plastic nga surudlan.
Iginsumat pa han mga imbestigador nga an narekupo han kapulisan amo an sobra han ira iginbaligya ha Marabut kay waray tanan palita han ira kliyente.
Gindara ha Tacloban City Police an mga suspetsado para han kaangayana nga disposisyon.
Mahugot nga igindederi han DENR an pagkuha hini nga agarwood. Ini nga parte han kahoy in nahuhurma ha butnga han kahoy tungod han alamag ngan tubig. Ini in ginhihimo nga insenso ngan mga pahamot hin rikuhanaon nga mga pamilya labi na ha Middle East.
Kasagaran han agarwood in nahuhurma ha mga puno han Lapnisan ngan Lanete. Tungod nga waray teknolohiya basi makuha ini tikang ha butnga han kahoy, gin-uutod an kahoy ngan ini in pagtalapas han Revised Forestry Code of the Philippines.
Ha pahayag han DENR, porlomenos 100,000 pesos an kantidad han kada kilo han agarwood. Tungod hini, damo nga katawhan an natutukso hini ngan waray na wantas an pagpinangutod hin kahoy basi makabiling hini nga agarwood. #
