Duha nga mag-anyag nga kadaragan-an an nagpalipay ngan naghatag hin onor para han mga taga Eastern Samar ngan Rehiyon Otso dida han katatapos pala nga paisan-isan han Binibining Pilipinas.
Hi Gabrielle Camille Basiano nga naka-angkon han 1st Runner-up ug an 2nd Runner-up nga hi Meiji Cruz in pareho taga Este han Samar an ira tagsatagsa nga iroy.
Dida han kompetisyon, hi Basiano in nagrepresentar han Eastern Samar. An iya nanay, hi Mary May Celada Basiano in taga Brgy Sabang South, Borongan City. An tatay ni Gab amo hi Manuelito “Intoy” Basiano.
Ha luyo nga bahin, an nanay ni Meiji amo hi Mylene Aculana nga taga Oras, Eastern Samar. Hi Cruz amo an tinaglawas han Valenzuela City kun diin didto hira nag-uukoy. Nakadaog hi Meiji han Best in Swimsuit contest dida hini nga kompetisyon.
Labot la han pagigin 1st Runner-Up, nakuha gihapon ni Basiano an Best in Long Gown dida han kompetisyon.
Hi Basiano in beterana na ha mga beauty and brains competitions kay nagin Miss PRISSA-Region 8 hiya dida han 2017, kaapi han Top 20 han 2018 Miss Earth Phils, ngan 1st Runner-Up han Miss Friendship International nga gindumara ha China hadton 2019. Hiya in nagtapos han kurso nga Tourism ha Asian Development Foundation College ha Tacloban.
Para naman kan Meiji, ini an iya ikaduha nga pag-api han paisan-isan. Hadton 2012 han 18-anyos pala hiya, nagpuweba na hiya han Binibini pero waray maka-angkon hin pwesto. Hiya in nagtapos hin AB Major in Mass Communications ha University of Lyceum Philippines.
An mga naka-angkon han Major Awards amo an masunod: Hannah Arnold (Masbate) – BB Pilipinas International; Samantha Panlilio (Cavite) – BB Pilipinas Grand International; Cindy Obenita (Cagayan de Oro) – BB Pilipinas Intercontinental; ngan hi Maureen Montagne (Batangas) – BB Pilipinas Globe. #
