Isumat.com/3:46AM, May 23, 2020
Waray makatapon an corona virus ha 186 katawo tikang ha Eastern Visayas nga ginkuhaan hin swab samples ngan ginpailarum ha Confirmatory Test.
An Eastern Visayas Regional Covid-19 Testing Center (EVRTC) in nagpagawas kagab-i han alas 9 an oras han resulta hini nga batch nga ginkokomponer hin 186 samples ug ngatanan negatibo.
Lakip hini nga resulta an ikatulo nga negative result ni EV Patient #7 tikang ha Burauen ngan EV Patient #9 tikang ha Tarangnan. Dara hini, hira ngaduha in hul-os na nga naka recover han sakit ngan puede na igka-urusa han katawhan.
Upod gihapon an ikaduha nga negative result ni EV Patient #11 nga taga Tarangnan, sanglit yana nga adlaw, papagawson na hiya ha EVRMC pero magkakaada pa hin duha ka semana nga Isolation Period. Kun ma discharge na ha hospital ini nga pasyente yana nga adlaw, waray na kumpirmado nga kaso han virus an naka-confine ha EVRMC-Magsaysay (Tacloban).
Magkasunod ini nga maupay nga notisya kasumpay han mga resulta han testing kay dida han alas 2 kakulop, negatibo gihapon ha corona virus an 53 nga swab samples nga gin proseso dida han laboratory.
Hapagkayana, porlomenos 200 pa nga swab samples an nakatalaan igpailarum ha confirmatory test han EVRTC.
Iginreport naman han DOH-Regional Office nga tobtob kakulop, an rehiyon in mayda 1,835 nga Suspected Cases kun diin 86 an naka-admit ha mga hospital ngan 1746 an aada ha Home Isolation. Nagpapabilin nga 26 ka tawo an nag positibo han virus ha rehiyon. # (KEVIN SIOSANA)
