Isumat.com/6:34PM, May 12, 2020
Malipayon nga iginpasamwak han DOH-Region 8 nga waray na nasasalin nga mga swab samples nga ginpapamulat an resulta han confirmatory test tikang ha Cebu.
Yana nga kulop, umabot na an resulta han 106 nga samples nga na-urhi an pag proseso ug ngatanan ini negatibo han corona virus.
Ini nga mga samples in tikang han gindumara nga contact tracing ha Tarangnan, Samar, sugad man gihapon han contact tracing ha Catbalogan City ngan mga suspected cases ha magkalaianlain nga lugar han rehiyon.
Kakulop nagtikang na an operasyon han Molecular Laboratory ha EVRMC ug an syahan nga batch han samples tikang hin walo ka tawo amo in negatibo.
Yana nga nag-abri na ini nga laboratoryo ha EVRMC, deri na magpapadara han samples ngadto ha Cebu ngan magigin madarudagmit na an pagproseso han samples, pahayag pa han DOH.
Samtang, dida han latest update han DOH yana nga kulop, 996 ka tawo an Suspected Cases ha Sinirangan Bisayas.
Nagpapabilin naman nga 20 ka tawo an nag positibo han virus ngan pito ha ira an naka-recover na. # (KEVIN SIOSANA)
