Isumat.com/6:35AM November 4, 2020
Nakatalaan umabot ha Bicol Region yana nga adlaw, Nobyembre 4, an usa ka gatos nga mga linemen tikang ha Eastern Visayas agud bumulig pag-ayad han nagkaguguba nga linya hin elektrisidad didto han mao nga lugar durot han Super Typoon Rolly.
Kakulop, lumakat na tikadto ha Bicol an mga linemen tikang ha Federation of Rural Electric Cooperatives ha Rehiyon Otso (FRECOR-8). Ini an ginlalakipan han DORELCO, LEYECO II, LEYECO III, LEYECO IV, LEYECO V, SOLECO, BILECO, ESAMELCO, NORSAMELCO, SAMELCO I ngan SAMELCO II.
Pag-abot ha Bicol, waray kakawangon nga panahon an mga personales han FRECOR-8 kay deretso dayon hira magtatrabaho ngan ginbabanabana nga porlomenos duha ka semana an ira estada ha Bicol para han rehabilitasyon han elektrisidad.
Dida han nag-agi nga duha ka adlaw, an mga linemen in nagpa-ilarum hin oryentasyon han ira mga obligasyon sugad man Health Protocols nga ira pagsusundon samtang aadto ha Bicol. Pag-abot nira didto, maagi gihapon hira hin Anti-Gen Testing ngan pagproseso han mga dokumento antis igpasarang ha magkalainlain nga lugar.
Labot la han mga personales, an FRECOR-8 an nagpadara gihapon hin heavy equipment sugad han mga boom trucks ngan mga ekipahes para hini nga responsabilidad paghatag hin ayuda han mga nadistroso han bagyo.
Dida han mga report katapos han bagyo, sobra 90 porsyento han mga poste han elektrisidad ha Bicol an nagkatutumba.
Ini nga pitad han FRECOR-8 in pagbalos han tim-os nga bulig han mga Electric Cooperatives ha Bicol ha pagpabalik han kuryente ha Sinirangan Bisayas katapos paglapingkahon han Bagyo Yolanda an rehiyon hadton 2013. #
