Usa ka tawo an binawi-an hin kinabuhi ngan upat pa nga iba an nagkaada hin karamtan ha lawas han ma-aksidente in usa nga public utility van ha national highway ha Brgy San Roque, Tolosa, Leyte pasado alas 6 han aga, Marso 7.
Sumala han impormasyon tikang ha Tolosa PNP, an SWELVETCO passenger van nga tikang ha Tacloban City tikadto ha Baybay City in nagsusulsog han kalsada han tigda nga mawarayan kontrol han manibela an drayber hinungdan han pag ekis-ekis han sarakyan. Waray na makabawi an nagmamaneho sanglit sinmampak an sarakyan ha usa steel gate ngan bumangga pa liwat hin konkreto nga pader. Hinsabutan nga hadto nga takna mahulos ngan madalunot an kalsada dara han sobra na usa ka adlaw nga pag-inuran.
Ginkilala an biktima nga hi Wilmer Cedric Bibar, 27 anyos, ngan taga Tabontabon, Leyte. Hiya an igin deklarar nga dead on arrival han mga doctor han hospital nga gindad-an ha iya. Hi Bibar in empleyado han Bureau of Fire Protection-Mahaplag, Leyte ngan tikadto na unta hiya han iya istasyon.
An driver ngahi Eearldel Ruiz ug an tulo pa nga mga pasaheros in gindara gihapon ha hospital basi pagtambalon han ira gin-antos nga mga bun-og ngan kasamdan ha lawas.
Padayon pa liwat an gindudumara nga imbestigasyon han mga kapulisan hini nga aksidente. Hinsabutan pa nga ini nga national highway dida hini nga barangay in gintutudlok nga accident-prone area labi na kun mauran. #
