Isumat.com/7:16PM, May 15, 2020
Usa ka tawo an naawat an kinabuhi ngan tulo pa nga iba an nag-antos hin karamtan ha lawas durot han pagtampalo ni Bagyo Ambo ha San Policarpo, Eastern Samar kun diin syahan nga natabo an landfall.
Sumala kan Mayor Thelma Nicart, an namatay in usa nga lalaki nga residente han Brgy. Natividad. Dida han impormasyon, nagkaada hin kasamdan an biktima tungod han nabu-ong nga salaming nga bintana ngan naubusan hin dugo.
An usa nga nasamad in taga Brgy. Alugan samtang an duha pa nga nasamaran in taga poblacion. Kadagmitan naman nga gindara ha hospital an mga samaran basi pagtambalon.
Iginsumat gihapon ni Nicart nga panguna yana nga kinahanglan han ira bungto amo an mga construction materials kay haros setenta porsyento han kabablayan ha iya bungto an nagkaruruba.
Naghangyo liwat an alkalde ha mga bungtuhanon nga waray madistroso an balay nga temporaryo nga pa-ukyon ha ira an iba nga nawarayan hin balay.
Sumala pa han alkalde, hi Ambo an ira ginkokonsiderar nga gikukusugi nga bagyo nga naglapingka ha ira lugar.
Hinsabutan liwat nga waray pa suplay hin kuryente didto hini nga bungto tobtob han ginsusurat ini nga notisya. # (KEVIN SIOSANA)
