Isumat.com/Hulyo 12, 2023
Duha nga bayolente nga panhitabo an nahipatik ha mga bungto han Gandara ngan Tarangnan ha Samar hadin nag-agi nga Hulyo 10, 2023 kun diin nagkawawara in duha nga kalalakin-an samtang usa naman an naawat an kinabuhi.
Ha report han PNP Regional Office, pasado alas 8 han gab-i han pagsulungon ngan pagpa-arakan hin bala hin grupo hin mga kalalakin-an an kabablayan han mga biktima ha Brgy Buao, Gandara, Samar. An nasabi nga barangay in porlomenos 20 kilometros an distansya tikang ha poblacion.
Katapos han panmusil, waray na kitaa an mga biktima nga hira Romualdo Armadilla ngan Dominador Armadilla, mga residente han mao nga lugar.
Tobtob han ginsusurat ini nga balita, ginpipinamiling pa han mga otoridad an duha nga nagkawawara. Gin-iimbestigar an anggulo nga ginsikmit han mga suspetsado an mga biktima.
An kapulisan in nagtudlok han mga suspek nga hira: Herman Morales, Arnel Alimango, Durito Alimango, Johnny Oblado, Johnny Castillo, Kiter Loberando, Yunib Cajuban, James Castillo, Francisco Raz, Edwin Cailo, Boboy Duran ngan alyas Enol. Hira in nag-uukoy gihapon ha mao nga barangay.
Ha follow-up operation, na-aresto hi James Castillo ngan nakumpiskar ha iya in kalibre 45 nga pistola, samtang ginhahalpat pa an iba nga mga suspetsado.
An mga suspetsado in naka-inom hin makahurubog nga irimnon ngan armado hin magkalainlain nga kalibre hin armas de fuego.
Nagsering an report nga posible lantugi ha pulitika an motibo han insidente.
Samtang, natad-an nga waray na kinabuhi ngan gintotoohan nga ginpusil an biktima ginkilala nga hi Perfecto Machate Jr ha Brgy Gallego, Tarangan, Samar.
An 38 anyos nga biktima in residente han Brgy Poblacion A han nasabi nga bungto.
Ha inisyal nga imbestigasyon, katapusan nga nakit-an nga buhi an biktima pasado alas 7 han gab-i nga nagmamaneho hin motorsiklo ha town proper. Paghagos hin sobra usa ka oras, natad-an nga patay na hiya sapit han motorsiklo ha Brgy Gallego, nga 30 minutos an biyahe tikang ha bungto.
An panhitabo in padayon pa gin-iimbestigar han mga otoridad basi matudlok an supetsado ug an motibo han krimen. #
