Isumat.com/Hulyo 21, 2022
Ginpangunahan ni Gobernador Sharee Ann Tan an groundbreaking han Spark Samar Sports Complex nga nagkakantidad hin 1.2 Bilyones pesos.
Ha Report han Philippine News Agency, an nasabi nga proyekto in namumutang ha Brgy Lagundi, kun diin 16-ektarya hin lote an pagtitindugan hin stadium, track oval, commercial strip, aquatics center, skate park, amphitheater, ngan iba pa nga mga facilidadis.
Ginlalauman nga makakaghatag ini hin dako nga bulig ha ekonomiya han probinsya pinaagi han dagko nga sporting events ngan mga katitirok nga pagdudumaraon dida han complex, labot la han mga negosyo nga mag-aabri ha sulod mismo han complex.
An pondo in magtitikang ha DPWH, Provincial Government ngan ayuda tikang ha National Government, pahayag pa ni Tan.
Yana nga tuig, an DPWH in magtitikang na han inisyal nga pagtrabaho para han syahan nga mga estraktura han proyekto, pahayag pa han report.
Ginlalauman nga matatapos an proyekto ha masunod nga pira ka tuig ngan tungod hini, gintatarget han probinsya nga managbalay han Palarang Pambansa ha tuig 2028.#
