Isumat.com/2:53PM, Marso 23, 2021
Andam hi Tacloban City Mayor Alfred Romualdez pagkarawat han bisan ano nga magigin resulta kun mag-imbestigar an DILG kasumpay han iya pagpaturok han Covid Vaccine.
Kun manunumduman, hi Romualdez an nagpabakuna hadin Marso 22 kadungan han panmakuna han mga Health Personnel ngan Frontliners han syudad.
An DILG Central Office in nagmando ngadto han alkalde nga mag-esplikar kun kay-ano nga naka-agom na hiya han bakuna. Sumala han DILG an mga bakuna yana nga mga panahon in para la han mga Health Personnel ngan Frontliners nga derekta iginkaka-urusa han mga magsakit.
Dida han press conference yana nga dlaw, Marso 23, hi Romualdez in nagsering nga ” I am ready to face the consequences” han iya ginbuhat. Sumala ha iya, an iya ginbuhat in pagpakita hin ehemplo ha mga health workers nga kinahanglan gud magpabakuna ngan deri pagsingabot an pagmalahi-una niya pagpabakuna.
Ginsayod han alkalde nga 50 porsyento la han mga health workers an naruruyag pagpabakuna sanglit nagdesisyon hiya nga magpaturok basi makumbinser an ngatanan nga deri delikado an nasabi nga bakuna.
Iya gihapon ginklaro nga deri ini pagsalbar han iya kinabuhi, lugod iya iginbutang ha kataragman an iya katalwasan basi la ma-aghat an iba nga magpabakuna. Bisaan ngani an iya mga doktor in nagsagdon ha iya nga deri magpabakuna kay mayda niya iba nga sakit, pero nagpabakuna la gihapon hiya basi mahipakita ha iba nga waray peligro ini.
Sumala pa ha iya, kun napaka-espesyal hiya, unta naghulat hiya han “branded vaccines” sugad han Pfiezer, Moderna ngan Astrazeninca. Pero waray niya ini himo-a ngan nagpaturok hiya han Sinovac basi masaksihan han tanan nga paprehas hira ngan deri hiya espesyal nga indibiduwal.
Nagsering naman hi City Legal Officer Atty Aldrin Quebec nga waray gintalapas nga patakaran hi Romualdez kay subay han guidelines, puede magpabakuna an Local Chief Executives ngan iba pa nga Frontliners kun may sobra an iginhatag nga bakuna para han health personnel.
Hi Romualdez in nagpahayag pa nga kanugon an sobra nga bakuna kun deri ini gagamiton ngan igbabalik lugod ha Manila. Nagkaada hin sobra nga bakuna tungod an iba nga health workers in waray makapasar han assesment ngan screening ug mayda mga commorbodities.
Iginpananglitan han alkalde an natabo ha Philippine General Hospital nga damo an nag-aalang pagpabakuna han syahan, pero han mag-una pagpaturok an Chief of Hospital, haros ngatanan nga personales han hospital in sumugot na pagpabakuna. Amo ini an dako nga rason kun kay-ano nga nagpabakuna hiya ngan mayda nira ginpapatamakan nga guidelines han IATF. #
