Isumat.com/12:15PM, Marso 24, 2021

Hi Tacloban City Mayor Alfred Romualdez in nangaro hin dispensa ha DILG ngan DOH tungod han kontrobersiya nga igindurot han iya pagpaturok han Covid Vaccine hadin Lunes nga adlaw.

Dida han programa ha iFM-RMN Radio Tacloban, nagpabati hin “public apology” hi Romualdez ngadto han nasabi nga mga ahensya nga amo an nagmugna han mga patakaran kasumpay han lista han mga prayoridad nga sektor para maka-agom han bakuna.

Sumala han amay han Tacloban, mapa-inubsanon hiya nga nagso-sorry ngan hul-os niya nga na-iintindihan kun magdumara man hin imbestigasyon an DILG kasumpay han insidente kay trabaho ini han ahensya. Iya gihapon ginklaro nga deri niya gin-aatuhan an mga ahensya ngan hitaas an iya respeto han nasabi nga mga buhatan han gobyerno.

Gintagan hin duon ni Romualdez nga waray malisya an iya ginbuhat, kay kun maraot an iya intensyon o nasingabot hiya han iya pagigin mayor, unta iya ini iginsekreto ngan waray igpakita ha publiko an iya pagpabakuna.

Amo nga iginpadayag ko ha ngatanan an akon pagpabakuna kay waray malisya ini, lugod iginbutang ko ha peligro an akon kinabuhi basi la makaghatag hin susbaranan ha mga health workers ug ha publiko nga deri mahadlok han bakuna.

Nag-esplikar gihapon an opisyal kun kay-ano nga deri hiya naka face mask han bakunahan hiya. Sering niya, ginpatanggal an iya face mask han mga taga City Health Office basi ma-obserbaran an dagway han iya nawong kun mayda ba mala-in nga epekto an bakuna.

Iginbuyagyag pa han alkalde nga sobra usa ka yukot nga health personnel ngan frontliners han Tacloban an nakatalaan bakunahan, pero na-alarma hiya kay 300 pala an nagpaturok dida han Lunes kay nagruruhaduha ngan nagkakahahadlok. Hinungdan hini, tigda hiya nagdesisyon nga magpabakuna kay kawang la an vaccine kun deri ini gagamiton ngan basi deri na mahadlok an mga health personnel.

Nagpahayag pa hi Romualdez nga mas pipili-on niya an halipot nga kinabuhi basta may ginbubuhat, kontra hin hilawig nga kinabuhi pero nag-iinukoy la, sanglit kinahanglan na niya maghimo hin aksyon nga magpabakuna bisan kun naderi an iya personal doctor. Iya igindig-on nga para ha iya, amo ini an pinaka-epektibo nga pagbulig han paningkamot han gobyerno ha pagkumbinser han katawhan nga magpabakuna.

Tungod han iya pagpabakuna, iginreport han City Health Office nga tobtob han aga han Marso 24, umabot na ha 1300 nga health workers han Tacloban an nagpaturok kay na-aghat han ginhimo han mayor.

Nanginginyupo gihapon hi Romualdez ha DOH nga deri na unta igbalik ha Metro Manila an sobra nga mga bakuna kay damo na an nag-interes ha Tacloban nga magpapahi-agom hini.

Naha-una hini, hi Romualdez in nagsering nga andam niya karawaton kun ano man an magigin desisyon han DILG han iya binuhatan. An DILG in manginginano kun mayda natalapas nga reglamento an alkalde dida han paghatag hin prayoridad han mga babakunahan. #