Isumat.com/7:22AM, October 30, 2020

Na-aresto in usa nga konsehal han Jaro, Leyte han mahidabi hiya hin panmusil hin usa nga pulis didto han nasabi nga bungto kakulop, Oktubre 29, 2020.

Ginkilala an suspetsado nga hi Landelino Katangkatang, Municipal Councilor ngan residente han Brgy II, Poblacion. Ginpipinamiling naman han kapulisan an duha nga iya kaupdanan nga hira Oyay Senecio, taga Brgy Parasan, ngan Roque Pabo, nga empleyado han LGU.

Talwas naman ha peligro an ginpusil nga hi Master Sgt. Manuel Ciocson, miembro han Jaro PNP ngan nag-uukoy ha Brgy Buri.

Dida han imbestigasyon, hi Ciocson in nagpapagasolina han iya motorsiklo banda alas 6 han aga han tigda nga umabot an usa nga kotse nga ginmamaneho-an ni Katangkatang ngan sakay hira Pabo ngan Senecio. Sumala han report han PNP, hi Pabo an nagpusil kan Ciocson, pero waray maka-igo.

Subay han impormasyon, nakahimo hin pakadalagan an sarhento kay waray dayon makapabuto hi Pabo kay ginkasa pa an M-14. Pakapabuto han suspetsado naka distansya na an biktima.

Tungod han napakyas nga pag-ikaparatay, kadagmitan nga nan-ikyas an mga suspetsado. Ha gilayon nga takna, nagbuhat hin paghalpat han mga gintatahapan an mga otoridad ngan nasikmit an konsehal, samtang padayon an pamiling han iya kaupdanan.

Hi Katangkatang in retirado nga koronel han PNP nga nagdaog pagka-konsehal han bungto. Subay pa gihapon han impormasyon nga nahikay han Isumat.com, an konsehal ug an sarhento in magparyente pa ha Katangkatang nga tulin.

Dida han panmaki-ana han Isumat.com kan Jaro Police Chief Edgar De Asis, sasampaan nira hin kaso nga Attempted Murder an mga suspetsado.

Hi De Asis in nagsumat nga nakilal-an ni Ciocson an mga suspetsado kay nakalingi pa hiya ngadto han kotse antis hiya pusilon. Mayda babaye nga nakaguli-at han pupusilon na hi Ciocson sanglit na-alerto an sarhento.

Iginbuyagyag gihapon ni De Asis nga labot la kan Ciocson, mayda pa duha nga testigos nga nakakita ngan nakakilala han mga suspetsado.

Nakuhaan gihapon han CCTV an paghaw-as ni Katangkatang han kotse pag-abot ha ira balay tikang han lugar han insidente, sering pa ni De Asis.

Igindiwara anay han Konsehal nga nadadabi hiya pinaagi han pagsering nga pagmamata pala niya ngan waray hiya lumakat, pero nag-insister an kapulisan nga nakilal-an hira ni Ciocson ngan iba pa nga testigos, labot la han CCTV footage.

Hi Ciocson in Intelligence Officer han PNP-Jaro. Nagsering hi De Asis nga usa han mga anggulo nga gin-iimbestigar an personal nga kasinahon ni Katangkatang kan Ciocson. #