(Image by philippinelifestyle.com)

Isumat.com/Marso 1, 2022

Am mga kaapi han Philippine National Police in kinahanglan mag-ikmat labi na adton mga giyanos pagpusta han on-line nga burublang hin manok.

Usa nga pulis denhi ha Rehiyon Otso in naatubang hin kaso administratibo nga Grave Misconduct sugad man pakasupak han Presidential Decree 1602 o an balaud mahitungod han iligal nga huygo.

Dida han report han PNP-Region 8, ginkilala an ginkasuhan nga pulis nga hi SSgt Jefrrey Cabelin. Ini in dara han iya pagtinaya han e-sabong. Waray igsumat han report kun diin nakadestino an nasabi nga pulis.

Tungod han mga kaso nga iginsampa kontra ha iya, hi Cabelin in gin-suspender ha serbisyo ha sulod hin 60 ka adlaw.

Kadungan hini, hi PNP Regional Director BGen Bernard Banac in nagdig-on nga deri hiya makunsenter ha bisan hin-o nga pulis nga makakasupak han kamanduan han liderato han PNP nga nagdederi ha mga tinubyanan han balaud nga magmulay han e-sabong ha mga takna nga naka-duty hira. #