Isumat.com/Hulyo 7, 2022
Nagpasarang hin kadugangan nga pwersa an Philippine Army ha Northern Samar katapos la han nahitabo nga pagpabuto hin landmine han mga kumunista nga terorista hadin Hulyo 5, 2022 ha bungto han Mapanas kun diin pito nga kasundaluhan an nag-antos hin kasamdan.
Nagpahayag hi 8th Infantry Division Spokesperson Capt Ryan Layug, ginpakurukusog han militar an ira pwersa ha paglanat han mga rebelde sugad man gihapon basi matagan hin hingpit nga seguridad an pag-implementar han mga proyekto han gobyerno para han tay-aw nga mga barangay.
Sumala kan Layug, an 3rd Infantry Battalion nga igindestino ha probinsya han Samar durante han eleksyon in adto na yana ha Northern Samar partikular ha Pacific Towns basi pangunahan an paglanat ha mga NPA rebels.
An mga sundalo nga nabulig pagtukod han mga proyekto an gintatarget han mga rebelde, sanglit angay la nga katagan hira hin seguridad, pahayag pa han opisyal.
Kasumpay hini, igindig-on ni MajGen Edgardo De Leon, 8th Infantry Division Commander, nga determinado an AFP nga tapuson na an pagsinamok han mga rebelde ha Sinirangan Bisayas.
Sering pa han heneral, maiha na nga panahon an ginhihinulat han katawhan para hin mamurayaw ngan mainuswagon nga kinabuhi, ngan waray NPA nga nakakasamok.
Ha atubangan hini nga mga panhitabo, nagsering hi De Leon nga igpapadayon han gobyerno an flagship projects nga makakabenepisyo han mga mulopyo.
Hadton Hulyo 5, an mga rebelde in nag-ambush han mga tropa han 20th Infantry Battalion ha Brgy Magsaysay, Mapanas pinaagi hin pagpabuto hin mga bomba nga igintanum ha tuna ngan pito nga sundalo an nag-antos hin kasamdan.#
