Isumat.com/8:09AM Pebrero 18, 2021
An Philippine Charity Sweepstakes Office (PCSO) in nagpadangat hin komunikasyon ha PNP Region 8 sugad man ha buhatan han National Bureau of Investigation (NBI) nagpapasabot han opisyal nga pagbalik han operasyon han Small Town Lottery ha Tacloban ngan Leyte.
Hi PCSO Vice-Chairperson ngan General Manager Royina Garma in nagsurat kanda NBI Acting Regional Director Jerry Abiera ngan PNP-8 Chief Police BGeneral Ronaldo de Jesus nga an PCSO in nag-aprobar han pagbalik han operasyon han STL ha nasabi nga mga lugar kun diin an magdudumara amo an Victoria Development and Gaming Corporation komo Authorized Agent Corporation.
Dida han komunikasyon petsado Pebrero 15, iginpadangat ni Garma ngadto kanda De Jesus ngan Abiera an pagpasalamat han ira kooperasyon ha mga programa han PCSO.
Partikular nga gintudlok ni Garma an waray hunong nga panlimbasog han mga otoridad han ira kampanya kontra han iligal nga huruygo ha ira nasasakupan nga mga lugar.
An Small Town Lottery in pormal nagtikang pagbalik an pagpataya ngan pagbola ha Tacloban ngan Leyte hadin Pebrero 16, subay han kamanduan han PCSO.
An mga resulta han STL-Pares, STL Swer3 ngan STL-Swer2 in ginbolala ha PCSO-Cebu kada alas 10:30 han aga, alas 3 han kulop, ngan alas 7 ha gab-i kada adlaw. Makikit-an ini hin “live” ha facebook page han PCSO Cebu Branch STL Results. An resulta han bola amo an winning numbers para han manaraya han STL ha Central ngan Eastern Visayas.
Bisan kun adto ha Cebu an bola, mayda taga PCSO-Tacloban an napakadto ha opisina han Victoria Devt and Ventures Corp ha Diit, Tacloban basi mag-witness han proseso.
Kasumpay hini, an mga parokyano han STL in gin-aaghat nga didto la tumaya han otorisado nga mga Sales Agent kay amo ini hira an lehitimo nga nagpapataya. An PCSO in nagkakaada hin pondo pinaagi han legal nga mga korporasyon sugad hanVictoria. Ini nga pondo amo an iginpapahi-agom ngadto han mga katawhan nga naaro hin bulig ha PCSO.
Ha iligal nga pagpa-huygo, waray ini amot ngadto ha PCSO ngan gobyerno sanglit waray nabubulig ngadto han mga nagkikinahanglan hin ayuda. Amo ini an rason han kampanya kontra han illegal gambling. #
